17:40 Mowzuk

Durmuşda ähli zadyň iki tarapy bar, edil taýagyň iki ujunyň bolşy ýaly. Biziň çykarýan netijämiz bolan ýa bolýan wakany haýsy tarapyndan synlaýşymyza bagly. Ýönelige «Bir-ä bakmak bar, birem görüp bilmek» diýlenog-a. Ynsan ykbaly ýeňişlerden, ýeňlişlerden, ýetilen-u-ýetilmedik arzuwlardan, düýşlerden ybarat. Bulary hakykata öwürýän, ýaşaýan we ýaşadýan adamyň özi. Aslynda, ömür — synag. Bu synagdan üstünlikli geçmek her kimiň özüne bagly. Gürrüp «wagt» diýlen mümkinçilikden peýdalanyp bilşimize barýar. Genri Forduň nygtaýşy ýaly: «Kyn iş wagtynda ýerine ýetirilmedik aňsat işleriň birikmeginden emele gelýär».

Her müçede ynsanyň belli islegleri hem maksatlary bar. Olary bir ujundan gazanmak, belki, hemmämize nesip edenok. Möhüm zat durmuşdaky ýeňişlerden hem ýeňlişlerden sapak alyp bilmek. Hiç bir gazanylýan üstünligiň arkasynda tötänlik ýatanok. Belki, onuň arkasynda bir aý, bir ýyl ýa-da tutuş bir ömür çekilen yhlasly zähmet bardyr. Aýdaly, ýokary okuw mekdebine synaga barýarkak içimizden «gowy bilýän temamyzyň düşmegini» dilemeýänimiz ýa arzuwlarymyz bilen bagly çaltrak eýle bolsa, ýa beýle bolsa diýmeýänimiz ýokdur. Elbetde, islemek gaty möhüm. Ýöne oturan ýeriňde islemek bilen, isleýän menziliňe tarap ýöräp barýarkaň göz öňüne getiripň islemegiň arasynda uly parh bar. Sebäbi ata-babalarymyz «Herekete-bereket» diýipdir-ä. Meselem, bir garly gün gardan top ýasaýşyňyzy göz öňüne getiriň! Ony öňüňize salyp togaladygyňyzça ulalar. Has ulalsa-da, boýuňyza deňleşer. Ýanynda kiçelmäge başlarsyňyz. Iň soňunda ikä bölünip, siziň üstüňize gaýtmak howpy bardyr. Biziň kynçylyk, şowsuzlyk hasaplaýan meselelerimizem şeýle. Eger bar ünsümizi olara bersek, diňe ruhy däl, fiziki babatda-da saglygymyza çynlakaý zyýan ýetirip biler. Tersine, bolmaly zat hökmünde kabul edip, kiçijik synaglaryň öňünde ýylgyryp dim-dik dursak, ýeňiş gazanan biz bolarys. Soňunyň garaşyşymyz ýaly bolmajagayny öňünden çaklasak-da, herekete geçmän netijäni bolmaly zat ýaly kabul etmegimiz ýalňyşlykdyr.

Edil sözüň dowamynyň şygyr, şygryň dowamynyň aýdym bolşy ýaly, gowy niýetiň dowamy gowy işlere elter. Islendik ak göwünden çekilen zähmetiň soňy bolsa rehnetdir, üstünlikdir. öz maksatlarymyz, geljek, daş-töweregimiz, adamlar hakda gowy pikir edip bilsek, ýagşylyk etmäge meýilli bolsak, gitmek isleýän ýerimiziň özi alnymyza geler. Sebäbi dünýädäki ýollaryň barysy diýen ýaly iki gatnawly hem öwrümlidir. Adam nähili pikir etse, hut şonuň ýaly-da görýär, eşidýär we ýaşaýar. Has dogrusy, biziň pikirlerimiz-biziň ykbalymyzyň şeklidir. Men byr zada çynym bilen ynanýaryn: hiç bir zat daşyndan görnüşi ýaly däl. Biziň etmeli zadymyz gowy tarapyny görüp bilmek, gowulyga ýorup bilmek. Türkmen aga ýöne ýerden «Bähbit bolsun!» diýýän däldir. Özgeleriň ýeten üstünligine guwanmak mertlikdir. Eger «Näme üçin men däl, ol?» diýip, içimizi hümledip ýörsek, öz elimizdäki artykmaçlyklarymyzy görmeris. Öňden gideniň «Berekellasyny» ýetirmek, arkadan gelýänlere gowy görelde bolmak türkmençiligiň artykmaçlyklary hökmünde, biziň ýaşlykdan gulagymyza guýuldy. Gurbannazar şahyryň sözleri bilen aýtsak: «Kynçylyk ýok, ejizlik bar dünýäde» ýa-da biz ejizligi diňe söýgi, gowy niýet, gowy pikirler bilen ýeňip bileris.