15:32 Mowzuk

Türkmenistanyň Telewideniýe, radiogepleşikler we kinematografiýa baradaky döwlet komitetiniň Oguz han adyndaky “Türkmenfilm” birleşigi hem-de ýurdumyzyň teleýaýlymlary tarapyndan Täze ýyl baýramçylygy mynasybetli täze filmler surata düşürildi. “Türkmenistan” gazetiniň habarçysy Muhammet Bekgiýewiň Oguz han adyndaky “Türkmenfilm”birleşiginiň başlygy Ýazmyrat Şadurdyýew bilen taýýarlan söhbetdeşligine esaslanyp, okyjylarymyza baýramçylyk günlerinde türkmen teleýaýlymlarynda görkeziljek filmler barada maglumat berýäris.
- Şu ýyl baýramçylyk mynasybetli Türkmenistanyň Telewideniýe, radiogepleşikler we kinematografiýa baradaky döwlet komitetiniň “Türkmen owazy”, “Miras” teleýaýlymlary bilen bilelikde “Şatlyk” (režissýory Gülälek Hezretgulyýewa), “Täze ýyl şüweleňi” (režissýory Eziz Işangulyýew), “Bäsleşik” (režissýory Tirkiş Garaýew) ýaly täze filmleri surata düşürdik. Şu ýyl önümçilikde ilkinji gezek ýola goýan işimiziň esasynda “Täze ýyl arzuwlary” atly filmi-de surata düşürdik. Olarda ýurdumyzyň ösüşleri, bagtyýar ýaşlyk, maşgala baýramçylygynyň şüweleňi bilen bagly wakalar öz beýanyny tapýar - diýip, birleşigiň başlygy täze filmler barada maglumat berýär.
“Täze ýyl arzuwlary” - Türkmen döwlet medeniýet institutynyň talyplarynyň kino sungatynda eden ilkinji synanyşygydyr. Filmiň režissýorlary hem, operatorlary hem, keşpleri ýerine ýetirýänler-de institutyň talyplary. Täze film baýramçylyk günlerinde “Ýaşlyk” teleýaýlymy tarapyndan tomaşaçylara ýetiriler.
Tamamlanyp barýan ýylda Oguz han adyndaky “Türkmenfilm” birleşigi tarapyndan täze filmleriň birnäçesi surata düşürildi. Olaryň arasynda “Bagtyýarlyk binýady”, “Täze zaman”, “Täsin sowgat”, “Ata kesbi - ogla halal”, “Kalbyň senasy”, “Türkmen tebigatynyň täsinlikleri”, “Jan Watanym Türkmenistan!”, “Halkara awtoralli ýaryşy”, “Telekeçilik - ösüşiň kämil ýoly” ýaly telewizýon we çeper filmler, “Mämmetjan”, “Dostluk”, “Dünýäniň görki” ýaly multfilmler surata düşürildi. Häzirki günlerde bolsa kinorežissýor Myrat Orazow tarapyndan “Beýik Ýüpek ýoly” atly doly göwrümli çeper film surata düşürilýär.